Խտրականության դեմ պայքարի և հանուն հավասարության կոալիցիան հաստատակամորեն առաջնորդվում է հավասարության, համերաշխության և արդարության սկզբունքներով: Մենք հավատում ենք, որ յուրաքանչյուր անձ արժանի է հարգալից և արժանապատիվ վերաբերմունքի՝ անկախ նրա ծագումից, սոցիալական կարգավիճակից կամ այլ հատկանիշներից: 

Այսօր, երբ Ադրբեջանի հերթական ռազմական հարձակման հետևանքով տասնյակ հազարավոր հայեր բռնի տեղահանվում և ապաստան են փնտրում Հայաստանում, մենք ականատես ենք լինում մեր հասարակության զգալի մասի նվիրվածությանը այս արժեքներին։ 

Սակայն նկատում ենք նաև բռնի տեղահանվածների նկատմամբ խտրականության,  անհանդուրժողականության և ատելության խոսքի դրսևորումներ։ Բռնի տեղահանվածների նկատմամբ ատելության խոսքը ոչ միայն խաթարում է նրանց ուղղված մեր բազում հայրենակիցների մարդասիրական ջանքերը, այլև պառակտում է սերմանում հասարակության մեջ: Մենք իրավունք չունենք մոռանալու, որ այս ճգնաժամի պատճառն ի վերջո հայերի նկատմամբ տարիներ շարունակ ատելության և թշնամանքի տարածումն է եղել։ 

Այս դժվար ժամանակներում չափազանց կարևոր է, որ մենք համախմբվենք որպես հասարակություն։ Կարեկցանքի և համերաշխության մեր ընդհանուր արժեքները պետք է գերակայեն: Մենք պետք է գիտակցենք, որ բռնի տեղահանվածները փախչում են բռնությունից, կորուստներից և հուսահատությունից՝ փնտրելով ապահովություն և իրենց կյանքը վերականգնելու հնարավորություն:

Կոալիցիան կոչ է անում 

ՀՀ Կառավարությանը՝ 

  • Ստեղծել բարենպաստ, խտրականությունից ու ատելությունից զերծ միջավայր, որտեղ յուրաքանչյուր բռնի տեղահանված արցախցի հնարավորություն կունենա իրացնել իր բոլոր իրավունքները։

Բոլոր քաղաքական ուժերին՝ 

  • Խուսափել Արցախից բռնի տեղահանված հայերի խնդիրները սեփական նեղ քաղաքական և տնտեսական շահերի սպասարկման համար օգտագործելուց,
  • Ներդնել բոլոր ջանքերը հանդուրժող, համերաշխ և բարյացկամ միջավայր ունենալու համար,
  • Բացառել ցանկացած տեսակի խտրականություն և ատելության խոսք, բարձրաձայն դատապարտել այդ երևույթները և կոչ անել, որպեսզի այս դրսևորումները բացառվեն նաև ցանկացած քաղաքական ուժի հարող քաղաքացիների շրջանում։

Քաղաքացիներին՝ 

  • Ակտիվորեն արտահայտվել բռնի տեղահանվածների նկատմամբ ատելության խոսքի և խտրականության դեմ,
  • Ձեռք մեկնել և աջակցություն ցուցաբերել բռնի տեղահանված մեր հայրենակիցներին։